-Útilega í garðinum-

Mánudagur, 28. júlí 2008

Gærdagurinn markaði ákveðin tímamót hjá okkur hjónakornunum. Við ákváðum að tjalda Grána gamla, tjaldvagninum sem við keyptum fyrir nokkrum árum og hefur ekki verið tjaldað í tvö ár. Ég var þess fullviss um að hann væri orðinn fullur af raka og hreinlega ónýtur og taldi víst að næsta skref yrði að keyra hann á gámavöllinn.

Hann reyndist vera skraufþurr og allt í góðu lagi. Við vissum að það þyrfti að styrkja undirstöður undir svefnrýminu og það leysti húsbóndinn á snilldar hátt.

Þetta dunduðum við okkur við í rólegheitum og útkoman varð sú að Gráni gamli stendur bísperrtur úti í garði og hefur aldrei verið eins vel uppreistur hjá okkur.

Þar sem Dýrunn er ekki með ofurminni á ýmislegt sem gerst hefur í hennar barnæsku líkt og Friðrik (og ég þegar ég var lítil) man hún ekki eftir gistinóttum sínum í vagninum. Það var því brugðið á það ráð að við mæðgur sváfum úti í garði. Það var mjög notalegt enda hlýtt í veðri (við kyntum auðvitað líka). Um þrjúleytið vaknaði Dýrunn og þurfti að pissa, það var því farinn leiðangur inn í pissuferð, skriðið aftur inn í vagn og við sváfum þar til klukkan var langt gengin í tíu og nota bene það er þokkalegt útsofelsi hjá mér sem tek daginn yfirleitt snemma á virkum dögum. Við hófum daginn með góðan skammt af fersku súrefni í æðunum.

Það var aðeins minnst á hvort við ættum að fara bara í útilegu um verslunarmannahelgina en ákveðið að láta Króksmótið duga og þangað brunum við aðra helgina í ágúst með Grána í eftirdragi og biðjum veðurguðina um stillt veður, að minnsta kosti meðan við reisum þann gamla, reynslan hefur kennt okkur að ekki er gott að hafa vind þegar honum er púslað saman. Nokkrir úr fjölskyldunni geta vitnað um það eftir fyrstu uppsetningu á ættarmóti í Snæhvammi þegar við fukum næstum á haf út í mestu kviðunum. Það var mikil áreynsla á hjónabandið en það stóðst þær hremmingar.

Hafið það eins og þið viljið, heima eða að heiman Grin

Flokkur: Bloggar | Facebook

Athugasemdir

Sesselja Fjóla Þorsteinsdóttir, 28.7.2008 kl. 16:35

Já það er aldeilis..

Nýr bíll og bara næstum því nýr tjaldvagn.. :) Til hammó með það og takk aftur fyrir sendinguna.

Góða helgi..

Dreifbýlistúttan (IP-tala skráð) 29.7.2008 kl. 14:00

Já næstum því nýr aldur er jú afstæður, ekki er ég gömul 38 ára (mér finnst það ekki), er þá tjaldvagn sem er um tuttugu ára gamall? Svari hver fyrir sig. Í það minnsta er ég alsæl með þann gamla í dag þó ég hafi um tíma viljað senda hann í "sveitina" langt í burtu.