Bjarg á veginum !

Oft þykir mér frekar óspennandi að keyra skriðurnar á milli Stöðvarfjarðar og Breiðdalsvíkur þegar tíðin hefur verið rysjótt eins og núna, frost og rigning til skipis því þá hrynja nú niður hnullungar af ýmsum stærðum og gerðum á veginn sérstaklega í Kambaskriðunum. Ég fer því yfirleitt ekki í þannig umskiptum en hef ekki komist hjá því undanfarnar vikur þar sem ég hef verið með jóganámskeið í Breiðdalnum.

Í gær hentist ég yfir til að kenna jógað og það var svona smá mulningur og litlir steinar og ég varpaði öndinni léttar þegar ég var komin fram hjá mesta hættusvæðinu að mínu mati.  Skyggnið var frekar slæmt svo þegar ég var á heimleið klukkutíma síðar fór ég extra varlega þennan kafla, í það minnsta það hægt að ég gæti stöðvað með litlum fyrirvara. Viti menn, heljarinnar hlunkur var á miðjum veginum einmitt þar sem litlu steinarnir höfðu verið klukkutíma fyrr, veit ekki hvort hann skilgreinist sem steinn eða bjarg hehe en hann var nokkuð stór. Ég sveigði snilldarlega framhjá honum og þegar ég var komin úr skriðunum hringdi ég í Jósef til að biðja hann að tala við Vegagerðina svo hægt væri að fjarlægja hann af veginum. Keyrði svo sallaróleg heim, þegar heim var komið sagði Jósef að konan hjá Vegagerðinni hefði sagt "Hvað er hann enn á veginum, það var hringt fyrir klukkutíma og beðið um að láta sækja hann".  Þá fór um mig smá hrollur því hann hefur sem sagt pompað niður rétt eftir að ég fór um og fyrsti bíll væntanlega verið svo almennilegur að láta Vegagerðina vita. Hvers vegna enginn var mættur á staðinn veit ég ekki og sé enga ástæðu til að fárast yfir því en væntanlega er þessi elska horfinn niður í fjöru núna. Ég held áfram að kenna mitt jóga í Breiðdalnum og bið hnullungana vinsamlegast um að halda sig í fjöllunum meðan ég og aðrir bílar keyra þarna um.  

Að öðru leyti er þetta frekar skrýtin vika. Dýrunn er búin að vera lasin og ég verið heima hjá henni.  Það er alltaf frekar leiðinlegt að vera frá vinnu þetta lengi og einhvern veginn verður mér lítið úr verki hér heimavið. Daman er á batavegi og á morgun föstudag fáum við að vita úr blóðprufum sem voru teknar í gær, hvort þetta tengist streptókokkunum, er veirusýking eða einkirningssótt. Og vonandi hressist hún sem fyrst svo hún geti tekið þátt í öllu því skemmtilega sem verið er að bardúsa á aðventunni. 

Hafið það áfram eins og þið viljið....... 

 

 

Athugasemdir

[Áslaug (IP-tala skráð) 7.12.2007 kl. 16:48]

Já það er alltaf frekar ónotalegt að keyra þarna við svona aðstæður og óhuggulegt þetta með bjargið sem hefur hrunið rétt eftir að þú varst þarna á ferð.  

[Þóra (IP-tala skráð) 7.12.2007 kl. 23:28]

Þetta átti að vera svo flott, og ekkert grjóthrun eftir allar þessar breitingar.

Nei þetta er óhugnanlegt.  Og stór hættulegur kafli, eins og þú segir í svona veðri.

[Solveig Friðriksdóttir, 8.12.2007 kl. 09:38]

Já en ég vona að þeir hlýði mér og haldi sig í fjöllunum meðan ég og aðrir vegfarendur fara þarna um og ótrúlegt að ekki hafi orðið slys á mönnum í gegnum tíðina. Eins og þú sérð fórum við ekki Norður núna.